يونيو
هل مدننا مستأجرة ؟
( هذا السطر للدول العربية والخليج عدا السعودية: استمع لراشد الماجد وهو يغني: منك منقهر .. للاستمتاع بهذه التدوينة) .
تخيلوا معي هذا المشهد:
الأمور تأزمت مع إحدى الدول ودقت طبول الحرب وبسبب أو لآخر دخلت المملكة حرباً مع عدد من الدول .. أو أنها تعرضت لضرر هذه الحرب .. ولنفترض أن تبعات هذا الحرب سقوط عدد من الصواريخ في طريق الملك فهد مثلاً وكم صاروخ في جده من إحدى الدول << صورة مع التحية لأهل السياسة شرايكم فيني وأنا ما أحب أشوش علاقتنا مع الدول الأخرى وأذكر أسمائها 
بترك الفصحى شوي في هالتدوينة 
.. والظاهر بتزعل ناس كثير فأقروها وأحفظوها لأني ممكن بأحطها في المسودة قريب.
من جد جربتوا هالشعور السيء والذي لا نتمناه .. لكن ممكن أن يحدث ! ، ما الذي يمكن أن يحدث في الرياض مثلاً وغيرها من المدن الكبيرة في المملكة، كان هذا التساؤل يدور في رأسي كلما حدثت كارثة بيئية أو مواقف طارئة تثبت عدم وجود ” إدارة” أزمة لدينا ، وسبق تكلمت عنها في تدوينة سابقة ورغم أنها تدوينة من سنة إلا إذا قرأتها ثانية تشعر بأنها جديدة .
الآن تخيل أننا نتنبأ بالأحداث ونتوقع أن غداً سيسقط صاروخ في طريق خريص والملك فهد وبعض الأحياء التي تشهد كثافة سكانية .. وخلنا نمر على الجهات المعنية .. مر على أقرب مركز للدفاع المدني بتلقى ثلاثة يلعبون بلوت .. طبعاً ما تدري على أي ملة ممكن ينلعب فيها البلوت ثلاثة بس الحكومة أبخص ! غير أنهم يلعبون أصلاً منسدحين لأن الكروش الكبيرة ما تتحمل الجلوس فترة طويلة .. هذا إذا ما طليت في الوايت وشفته فاضي وإلا التجهيزات الثانية الناقصة ” باعتبار أن الرياض منطقة صحراوية فما له داعي وجود قوارب نجاة مثلاً ! ” .
وتطلع منها لمركز الشرطة وبتلقى كل شخص في حاله ، وتجد العسكري منكباً على أحد المواطنين تقل يقرى عليه وهو يقول له : أحمد ربك يا رجال سيارتك سردزت .. يا ما سيارات سردزت وفيها عيال وحريم ، وتلقى المواطن يرفع رأسه وعينيه تغرورق بالدموع : انا سيارتي سرقت وفيها عيالي وحرمتي 
… ويرد العسكري بكل حكمة ودماثة تشع من عينيه: يا رجال أحمد ربك يا ما سيارات سردزت وفيها عيال وحريم ولاب توب ومشغل دي في دي . >> مع الرقيب علي مافيش مستحييل
والآخر يقول لمن كُسرت زجاجة سيارته : يا رجال كان خليت اللبتوت ( اللاب توب) في الشنطة والا حولتها معك .. حقين الجنائي مهب فاضين ومشغولين .. وبعدين تلقاه لابس دسوس ماهنا بصمات
ولما المواطن يحاول يلح عليه ويقول بأن هذا اللابتوب يحوي عمره وتعبه في المشاريع .. فيقول العسكري: يا رجال إذا تعرف واسطة بتضبط أمورك .. بعدين انت فاسق تصيح على لاب توب علشان بلوت !! >> طبعاً وكيل الرقباء أبو سعيد فاهم المشاريع غلط
وانتقل لأحد المستشفيات وقبل أن تدخلها بيجيك السيكورتي ماشي ألف ويردك : ما فيه زيارة يالحبيب .. :S ، وتتعب وأنت تقول له أنك رايح للأسعاف ولولا ضيق وقت البرنامج كان جبت سبورة وشرحتها له! ، ثم لما يسمح لك بالدخول يبدأ يفتشك سبحان الله يمكن مهرب أكل والا زمزمية شاهي من برى وحاط فيها شوربة من جوا زي حركات المراجعين .. مع ملاحظة أنك رايح للطوارئ أصلاً وما معك شي !!
طبعاً تدخل الطوارئ ثم تلقى سرى طويييل وبزارين يلعبون .. هذولي البزارين كانوا يلعبون مع أخوهم الي جته فلقه في زاوية جدار وجايين يقالهم دعم لوجستي! والا يزعجون الخلق وابوهم ما يبي يخليهم في البيت؟ ، عاد تتفاوت الإصابات، وانت رايح تتفرج بس، لكن كلن يشوتك على اعتبار ما فيك إلا العافية، والا انك فاسق مره وتبي تسوي تشيك على نفسك يعنني هاي هاي .. وتعال تشوف طبيب الطوارئ حايمتن تسبده ويكرش في المرضى وما عنده الا فيدادول وكم ضماد ، يجيه منفلق يربط جبهته ويعطيه فيدادول .. واحد مفقوعة عينه، والثاني جايه رباط صليبي والثالث جايه انسداد في قناة فالوب .. ومع ذلك ما عنده الا هالادوية وكل الممرضين منحاشين ما بقى الا واحد .. ولما تدور بقية الممرضين السعوديين تلقاهم في احدى المكاتب قاعدين يسولفون ويبادلون بعض سجائر ، ثم يهوشونك ليش تدخل الباب وهو مكتوب عليه ممنوع الدخول لغير المختصين !
وانت طالع ما تدري إلا جاي إسعاف ناقل كم واحد مصدومين في موكب تفحيط .. وملطوعين في السيب لين يمشي السرا .. وتناظر سواق الاسعاف نفسه في خشمه ويكلم العمليات يقول انه خلص ورديته ومهب فاضي يرجع السيارة للمركز بيلبقها في بيته وبيجيبها بكره، والي في العمليات منبح صوته يقول ترى فيه واحد مدعوس من سيارة زبايل و الرجال حول ما يموت ، والسواق يقول: والله اذا مات مهب مسؤوليتنا دقوا على الامانة احتياطا يشيلونه لمغسلة اموات.
عاد حزتها تطلع وأنت ضايق صدرك من الحياة وتاخذ لك كوفي وتوقف على تقاطع الملك فهد مع خريص والأمم متراصة كلن في قفى الثاني ونفوسهم في خشومهم، وأنت فاتح جوالك على مقطع غرق الرياض وقاعد تناظر ساعتك وتقول باقي على بكره كم ساعة وبيطب صاروخ يشق الرياض شق والله يا ابقعها ضحك عليكم يا عيال الايه !
فعلاً ! لنفترض أسوأ الأمور .. أثبتت القصص والمواقف التي تعرضنا لها عدم استعدادنا للظروف الصعبة لو حدثت، الكل يتهرب والكل يرمي مسؤوليته على الآخرين! ولا أقل من حادثة غرق الرياض .. يا جماعة الخير موية وسوت في الرياض الهوايل! أجل لو طاح صاروخ وش بيسوي ؟ نص الرياض بيموتون بسبب الصاروخ والنص الثاني جلطه من الروعة : يقولون ان الصاروخ بوه كيماوي !! ، حط في بالك هالصاروخ بيحرق السيارات وبيعدم الشوارع وبيشق مواصير الصرف والا المياه >> ريال بدوي مهب صاروخ خخ
هل عسكري الدفاع المدني المبجل قادر على المشي وصعود الأدوار ؟ مع ان طبيب النساء والولاده ناصحه انه يريح نفسه وبلاش من صعود الدرج، على طاري الأدوار ممكن تجدون الإجابة في اليوتيوب اكتبوا : الدفاع المدني وحريق برج دريم ، ستجدون المقاطع التي تجعلك تضحك ملء شدقيك .. الظاهر مافي الرياض رافعة إلا وحدة، ويوم جابوها ما تطول إلا عشرة أدوار !! والهليكوبتر ترش من فوق البرج تقل يطفون حرائق استراليا ! وفي الأخير نص الموية تروش الجيران والأحياء الخلفية .. وللمزيد من الضحك راجعوا اليوتيوب! ، لنفكر فيها .. ماذا لو حدث حريق في برج المملكة والا الفيصلية لا قدر الله ؟ كيف تنقذ المتسوقين وكيف يطفى الحريق وهي أطول من برج دريم المحترق!! سؤال أنتظر الإجابة عليه بكل صدق.
هل المرور قادر على تنظيم حركة السير والوصول في الوقت المحدد ؟! شوارعنا مع زحمة السيارات أصبحت مثل وريد شايب متقاعد فيه 69995 ألف جلطة ! لا شوارع جيدة لا طرق سالكة، الحفريات تستمر بالأشهر، وليست هناك آلية لإدارة الطريق بل كله من مجهودات ” وفزعة” بعض الشباب .. ولا أكبر دليل مثل حادثة أمطار الرياض، قبلها بيومين تجد طلاب الأمنية والشرطة كل إشارة فيها اثنين! حتى أن عندي إشارة عند مكتبنا مهجورة لدرجة أنك ممكن تحصل بنغالي يبيع عرق عند الإشارة .. وعند حملة ساهر وجدت دورية وأربعة عساكر!! ولكن أول ما غيمت الدنيا انحاشوا العساكر ولا لهم أي حس وطاري!! بعد ما هدأت الأمور رجعوا من جديد .. لا يا شيخ !! أكبر همكم أربط الحزام ولا تكلم بالجوال !!
الصحة وما أدراك ما الصحة .. في الأيام العادية نجيب واسطات علشان نلقى سرير في الممر .. نعم سرير في الممر أصبح نعمة ربانية يمكن تصاب بالعين بسببها .. في الأحوال العادية والظروف المعتادة مثل حوادث السير وغيرها .. ماذا لو حدث لنا حدث كبير وتعددت الإصابات ! أين نجد السرير .. وأين نجد مكاناً فارغاً في الممرات ؟! والمشكلة لم تعد في المستشفيات الحكومية حتى في القطاع الخاص والذي تدفع فيه من حلالك ومالك لا تكاد تجد فيه سرير بعض الأيام .. أعرف إماماً كان يريد أن يزيل الزائدة فدار على 7 مستشفيات حتى أجراها في التأمينات شرق الرياض مع أنه في البديعة !!
مع الأمطار تكتشف أن الشوارع أي كلام ، ولا يوجد فيها تصريف .. وزد على الأمطار امتلاء بعض الأحياء بالصرف الصحي لدرجة أنك ممكن تكتب وبكل اطمئنان على الحي ( الحاير فرع 2 ولا يوجد فرع غيرنا ! ) >> مهب عاقل فوال الطايف
الماء تنقطع في كثير من الأحياء، والغريب أنها بعض الأحياء في الشمال!! مقر سكن بعض المسؤولين والواصلين .. يعني استحوا شوية بئه !! يعني حنا مواطنين ونفهم بعض ونتحمل دائم، لكن تصل للأحياء الفخمة هذي بصراحة انجاز مو سهل ( على اعتبار أنهم بيعبوا من الوايت ولا همهم لا فلوس ولا تدوير والتعب على السواق )
الكهرباااء .. ويا محلى الكهرباء في الصيف .. ما تبدأ تصريحاتهم إلا لما تدخل المربعانية علشان يضمنون قلة الاستهلاك الكهربائي .. ويبدون سلسلة التصريحات عن عدم انقطاع التيار الكهربائي ويأخذون قروض من المالية على 10 مليارات ” مع ملاحظة أن فواتيرنا في الصيف تتعدى الألف ريال” بس ما تدري وين تروح هالدراهم !
لا بنية تحتية ولا شيء وما راح أتكلم على الاتصالات لأني سبق تكلمت عنها .. شغلات كثيرة تحس أنك ساكن في استراحة أو بيت مستأجر والي بانيه واحد ما يفكر يسكن فيه !!
أنا أعتقد أننا نسكن في مدينة مستأجرة! مافيها شيء يدوم للأبد .. لازم فيه مشكلات وحفريات .. مافيه أساس قوي ! مدينة قامت فجأة ثم في لحظة قالوا: اوه صح نسينا كذا وكذا ..
ما استبعد ممكن يصير لنا مثل بعض الدول .. عند المشاكل ينحاشون لدول أخرى ثم لما تهدى الأمور يرجعون ويظهرون كالأبطال ..
من جد فكرتوا الرياض الي حنا فيها مستأجرة ؟ وراعيها يجي بعد فتره يقول للوليد: تكفى اخلي المملكة بنزوج ولدنا فيه !!!
اعتذر بشدة كان أزعجتكم في هذه التدوينة .. بس من القهر والله !
هههههههههههههههههههههههههههه
تسلم يا عبدالله
أسلوب ساخر و ( هـــايل )
شي حصل لي على ذكر الطوارئ
أيام انفلونزا الخنازير جتني انفلونزا ولا أدري هي خنازير و إلا ماهي خنازير
المقصود : انتظر يدخلوني على الممرض !
الممرض بس !
ولكن للأسف أخذت وقت و أنا في الانتظار و لما رأوا الحالة منتهية دخلوني و لكن !!
عند الباب سقط سليمان فاقداً للشعور ليؤثر حد الباب في جبهته ولينقل بسرعة إلى الطبيب ثم يلام والده بعدها :
(المفروض هذا على الدكتور على طول يا مطوع !!)
عطوا سليمان مغذي و أدوية والله يستر عليه ..
تفاصيل الإجازة عند عبدالإلــه .
آسف على الإطالة .
نعم مستأجرة .
أجار منتهي بـ “الخقل” !
أليم يا عبد الله .. فعلاً أليم وكلام كبييييييييييييييييير ..
..
احييك على هذه التدوينة .. فعلاً رائعه ..
..
بس المشكلة تكلم مين وﻻ مين ..
الملك يعطي المسؤولية للوزير .. والوزير يعطيها اللي تحته .. واللي تحته يحولها للي تحته .. وآخر واحد توصله المسؤولية ما نلاقيه وقت المطر ..
ولما جبنا اجانب عشان يسيروا لنا امورنا زعلنا .. والحل معانا ؟!
جبت لي الكآبه لا عمرك تدون بالعامية تجيب العيد
حقيقة ما طرحته يستحق الإهتمام رغم وجود أمور بسيطة تواجه البلد
إلا أن الشرطة والدفاع المدني ولا يهون الإسعاف يفتقدون لأبسط
المعرفة بكيفية التصرف إن كانوا هم المختصين لا يعرفون كيف
يتصرفون في مثل هذه الحالات إذن من يتصرف ..؟!
أين الشخص الذي كان يقول لي قبل أيام البلد بنعمة ونحن شعب “بطران”
لا نجيد الا الإنتقاد وأن السعودية أروع بلد بالعالم وبعدها
القصيم أجمل منطقة في العالم وأن الحكومة أبخص :/
كلامه تبرير لكل المشاكل التي حصل في البلد الحكومة ما تقصر
كما يقول لكن من بالأسفل لم لا يؤدون واجباتهم كما هي ..؟!
أليست الحكومة مسؤولة عن مراقبة تصرفاتهم ووضعهم على الجادة
شكرًا جزيلًا لك
كم أنت مبدع يا أستاذي القدير عبد الله ..
موضوع في الصميم وحقيقة مره نعيشها في بلادنا التي ساهمت ولاتزال تساهم في مساعدة الدول المنكوبة ..
حفظك الله يامملكة الإنسانية ..
أمنيتي أن نكون متطورين وعلى مستوى راقي كالدول المتقدمة ..
استمتعت بهذه التدوينة الرائعة كما عودتنا دائما بمواضيعك الجميلة ..
حفظك الله وأتمنى لك دوام التوفيق ..
جبتها عـ الجرح .. من جد شئ يضيق الصدر .. بس السؤال هل نحن بحاجة للمآسي عشان المؤجر يصحصح ويسوي صيانة للدور / الشقة اللي مأجرها ؟؟
و ما هي الحلول المقترحة المطروحة يا عبدالله ؟
تحس أن البلد يحتضر فعلياً ، تشعر برغبة قوية لخلع رداء الوطنية عنك والفرار و أنت تردد من بقى ف داره قلّ مقداره !
و يارب تبقى التدوينة منشورة ، لا أفهم لما تريد اخفائها كمسوردة ! لأنها ستترك – حتماً – أثراً على من يقرأها.
عبدالله، شيء يجيب القهر ..
المشكلة إذا نقدنا البلد، قالوا ما عندكم وطنية..!!
فيه وطنية أكثر من حبنا لبلدنا وغيرتنا عليها..؟
كلش كوم وحقين المرور اللي اختفوا يوم جاء المطر، شفتها بعيوني والله ياعبدالله..
شيء قهرني فعلاً..
واصل واحنا معاك
صدق بو بانة يوم قال: “تدوينة جديدة بصيغة تويترية” أهنيك والله بو همام على التدوينة هاذي !!
<< بيضمن مستقبله خخ
جاري الحفظ و القراءة لعدة مرات مستقبلاً
أنت اسطورة يا عبدالله >>> اوخس ياسامي D:
اذا حدثت حرب او اعصار لا قدر الله
المسؤولين وكبار الشخصيات اول من يهرب وبعد ماتنتهي الازمه راح يرجعون على اساس انهم فعلوا شي
وتعرف الاعلام المطبل اللي عندنا
لو حدث عندنا مثل ماصار ايام كاترينا
كيف راح يكون الوضع
يعطيك العافية أبو همام وفعلاً تنقصنا إدارات الأزمات، ونحن بأمس الحاجة إلى وعي المسئولين بأنهم مقصرين!!!
انتبه على عمرك تراك بديت تتخطى الحدود الحمراء!!!
تدوينة جميلة مفعمة بالسخرية اللاذعة ..
البعض لا يحب هذا الأسلوب ، لا أدري لماذا ؟
من جد يااخي ..!
يارب إني أتوقع انها مستأجرة ..! والمسؤولين حابين يسوونها لنا مفاجأة وينقلونا للبيوت التمليك ” المدن االتمليك ”
اللي قاعدين يضبطونها لنا ..! وأنا أتوقع انها بالمغرب ؟ أو بـ لِبنان ههههههههههههه
عبدالله ..! كتبت واقع الحال اليومي للمواطنين ..! الله ياستر لا نوصل لدرجة عاااوزين رغيف العيييش .!
سليمان:
حياك الله .. وسعيد أنها حازت على رضى ( فضيلتكم )
أما سالفة الخنازير يبي لها جلسة في الملعب ( إياه) وخصوصا مع المؤثرات الخاصة بك ..
تحياتي لك
عمار ..
دنا غلبااااان
تسلم لمرورك يا جميل
CrEaTiVe :
والله فعلاً ! يعني الملك يصرح لهم بأنها من ذمته لذمة هؤلاء المسؤولين .. وبعدين المشكلة ما نقدر نلومه لأنه مهب معقولة نلاحقه في كل كبيرة وصغيرة .. وين راحوا المسؤولين !! وإن تكلمت عن الصحة والتعليم زعلوا هالوزراء !! طيب والحل
أنت تحفة رائعة تزدان بها مواضيعي .. كن بالقرب .. لا تلزق مره قريب شوي
نوفه:
أوووم التحطيم
نحن نحمل الحكومة ( الحكومة وشي ؟ ملك ووزراء ومسؤولين ) فهم يستحقون تحميل المسؤولية لكن الخطأ أحياناً من الذين ( تحتهم ) ويسلمون من العقاب! وهذه المشكلة .. نود أن يتم حصر المشكلة في الأشخاص المتسببين فعلاً .. يعني لو أعرف الشخص ” الخائن” الذي تسبب في غرق جده مثلاً أو سمح بالعبث في تصريف السيول بالرياض .. ما عندي مشكلة انه يدخل المحاكمة ولو يقتلونه تعزيراً !! أنا مجرم صح ؟ لكن لو نفكر فيها انا أأدب واحد وبيرتدع مية !
أشوى اني مو مسؤول
نوفه .. شكراً لعبقك
أبو وليد:
تسلم والله .. الأستاذ جابته أمك >> وراك معصب طيب
شرفتني بطلتك الحلوة، ونسأل الله التقدم لنا ولبلاد المسلمين ..
خذ مني أحلى بوسه بس لا تعلم أبو عبدالله
نور:
المشكلة المآسي تجي وتروح والمؤجر يا نايم والا عماله ما يعرفون يشتغلون ..
شكراً لنورك الي غطى الكهرباء
pastel
أهلاً بك
أنا متفائل شوي أكثر منك
لا أقول أنها تحتضر .. لكن فيه مشكلة كبيرة .. تحس أن الي يشتغل حاقد على البلد وهو يشتغل !! ما يهمه أحد .. ما يقول بكره بيعيشون عيالي ؟
وبالنسبة للنشر .. مدري تخبر بعض المسؤولين يتضايقون من النشر >> من باب الستر أحسن
تحياتي لك ولمرورك ..
محمد:
الظاهر يقصدون دجاج الوطنية ههههه ، ياخي صدقني لولا أننا شباب والله ممتعنا بالصحة لكن لو اننا ندون وحنا شيبان كان قسم بالله كل موقف تجيك عليه جلطه !
الله يصلح الحال ..
سعيد بمرورك مدونتي .. وأتمنى تكرر الزيارة للحين منيب مصدق هههه
عبدالرحمن الدريهم:
حياك .. والله يستر من المستقبل
حطها على ال بي سي احسن
إبراهيم:
أما اسطوري !!
الإعلام عندنا أكبر داء ممكن تواجهه .. لا يرضون الشعب ولا يعجبون المسؤولين .. وما تدري وشوله عايشين !!
تحياتي لك
أحمد المخيدش:
الله يستر أجل :S بكتب وصيتي وأعطيها لأبو فدوى
تخبر يمكن ما نلحق نرجع البيت
تحياتي لك .. وقبلاتي لليلى فقققققط
أبو سليمان:
أي البعض يا أبا سليمان ؟ تخبر الناس هنا : كاد المريب أن يقول خذوني ..
وتحياتي لمرورك العطر .. والله ما نسيت موضوعك
اولا يا عبدالله
انا استغرب عليك المدونه هذي
وكنت اتمنى انك ما تتكلم في هذا الموضوع
ولم يسألك احد موضوع الفساد
والشي الاخر انت تكلمت عن معلومات ماهي موجوده عندك
ولو كلمتنا كان عطيناك زود معلومات
بكل صراحة .. رائعة من روائعك الكثيرة يا عبدالله
وساخرة بكل ماتحمله الكلمة من معنى ..
(تفو.. ماشاء الله عليك)